Արդարադատության նախարար Ռուստամ Բադասյանի գլխավորությամբ այսօր տեղի է ունեցել աշխատանքային քննարկում՝ նվիրված Արցախյան պատերազմի ընթացքում Թուրքիայի և Ադրբեջանի կողմից վարձկանների և օտարերկրյա ահաբեկիչների օգտագործման առնչությամբ ներպետական և արտաքին իրավական գործընթացների ու ջանքերի համակարգմանը։

Արդարադատության նախարարության տեղեկատվության և հասարակայնության հետ կապերի վարչության հաղորդագրության համաձայն՝ քննարկմանը մասնակցել են Հայաստանի գլխավոր դատախազի տեղակալը, Մարդու իրավունքների եվրոպական դատարանում ՀՀ ներկայացուցիչը, Քննչական կոմիտեի, Ազգային անվտանգության ծառայության, Կենտրոնական բանկի և Մարդու իրավունքների պաշտպանի գրասենյակի ներկայացուցիչները:

Քննարկվել են միջազգային իրավական փոխօգնության և արտաքին իրավական գործընթացների համակարգմանն առնչվող հարցեր։

Հանդիպման ավարտին նման ձևաչափով աշխատանքը շարունակելու պայմանավորվածություն է ձեռք բերվել։

Արցախյան պատերազմի օրերին միջազգային մամուլը, արտասահմանյան երկրների ղեկավարներ, հատուկ ծառայություններ հաղորդում էին մարտական գործողություններին սիրիացի և լիբիացի վարձկան ահաբեկիչների մասնակցության մասին։

Հայկական կողմը հաղորդել է սիրիացի երկու վարձկանների գերեվարելու մասին, նրանք կալանավորված են, մեղադրանք է առաջադրվել։ Եվս երեք վարձկանների նկատմամբ հայտարարվել է հետախուզում, իսկ շուրջ երկու տասնյակ վարձկանների վերաբերյալ պարզված տվյալները հայկական կողմը փոխանցել է միջազգային տարբեր կազմակերպություններին, գործընկեր երկրների հատուկ ծառայություններին՝ հավելյալ տեղեկատվություն ստանալու, ինչպես նաև ցանկացած երկրի տարածքում նրանց հետագայում հայտնաբերելու դեպքում կալանավորելու և քրեական պատասխանատվության ենթարկելու համար:

https://www.azatutyun.am/a/30966378.html