ԱՄՆ-ի պետքարտուղար Մայք Փոմփեոն չնախատեսված այցով մեկնել է Իրաք, արձագանքելով Իրանի կողմից առաջացած նոր վտանգների, գրում է Ամերիկայի Ձայնը: Հատուկ ծառայությունների համաձայն, իրանական կողմը բալիստիկ հրթիռներ է տեղափոխել նավերի միջոցով իր սահմաններից դուրս: Հետախուզության համաձայն, հնարավոր է, որ Թեհրանը հրթիռային հարձակումներ է նախապատրաստում տարածաշրջանում տեղակայված ամերիկյան ուժերի դեմ.

«Միացյալ Նահանգները պաշտպանելու է իր շահերը միշտ եւ ամենուրեք: Եւ մենք միշտ համոզված պետք է լինենք, որ ունենք դրա համար անհրաժեշտ ուժերը: Ուստի իմ այցը եւ պաշտպանության նախարարության գործողություններն ուղերձ են Իրանի իշխանություններին, որը ստանալուց հետո նրանք երկու անգամ կմտածեն ամերիկյան շահերի դեմ հարձակում գործելուց առաջ»:

Ելույթ ունենալով Վաշինգտոնում, Իրանի հարցերով ԱՄՆ-ի հատուկ ներկայացուցիչ Բրայան Հուքն իր կողմից ընդգծել է, որ Վաշինգտոնը շարունակելու է Իրանի վրա առավել մեծ ճնշում գործադրել՝ ստիպելով Թեհրանին հրաժարվել ահաբեկչության ֆինանսավորումից եւ միջուկային ծրագրերից.

«Մենք չենք պատրաստվում Իրանի միջուկային շանտաժի պատանդները դառնալ»:

Հուքի խոսքով, ԱՄՆ-ի գործողությունների արդյունքներն արդեն զգացվում են՝ Իրանի կողմից ֆինանսավորվող ահաբեկչական կազմակերպությունների ֆինանսավորումը գրեթե ամբողջովին դադարել է.

«Մինչեւ իրանական ռեժիմը չփոխի իր պահելաձեւը, մեր ճնշումը չի դադարելու»:

Միացյալ Նահանգներն ի պատասխան Իրանի վերջին գործողությունների հայտարարել է «Աբրահամ Լինքոլն» ավիակիրը եւ B-52 ռմբակոծիչների խումբը Պարսից ծոց տեղափոխելու մասին:

https://m.shamshyan.com/hy/article/2019/05/09/1124427/